Tras disputar onte a Carreira da Filloa - Subida ao Pico Sacro, hoxe tocaba volver a poñer as zapatillas de trail e desprazarme ata Boiro, máis concretamente a parroquia de San Ramón de Bealo onde se celebraba o Trail de Bealo, sobre unha distancia de 14 km e que sería a miña primeira participación nesta proba.

Os obxectivos serán:

Unha vez cheguei e atopo un sitio onde aparcar, vou cara o arco de saída pensando que alí se facía a entrega de dorsais pero cando chego, vexo que non hai nada nin ninguén, por sorte o último coche da organización estaba marchando e pregúntolle onde era a entrega de dorsais, como xa quedaba pouco tempo dime que suba con el no coche e me acercan ata onde se facía a entrega. O problema foi que deixei o coche a medio camiño por iso non atopara o lugar da entrega. 

Xa co dorsal, cámbiome e comezo a quecer un pouco mentres nos diriximos ao arco de saída para rematar o quecemento e a que se dera a saída da proba.
Colócome na zona media xa que a primeira metade de carreira era todo para arriba e ía haber tempo de recuperar posicións. Dáse a saída e comezamos por unha subida de asfalto onde comezo a gañar postos.

Pasamos pola zona de meta e uns metros máis adiante comezamos unha baixada pequena para logo adentrarnos nas pistas forestais e comezar a subir.

A subida pódese dividir en tres partes: 

• A primeira era fácil de correr aínda que daba algo de pena ver como o lume arrasara esa zona e se vía todo queimado, unha verdadeira mágoa. 
• A segunda parte da subida era máis técnica xa que había que ir en fila de un e por camiños onde baixaba auga e algunhas zonas onde estaba estancada e non sabías a profundidade do buraco polo que había máis posibilidades de provocar unha torcedura. 
• Por último o camiño volvíase máis ancho para acabar de subir, onde xa non era tan técnico e se tiñas forzas podías subir correndo. 

Agora tocaba baixar un pequeno tramo que se agradecía para recuperar un pouco o alento xa que íamos polo km 5 e as pernas xa comezaban a cargarse de tanto subir. Nese momento adiántame Eduardo no seu quad e no que xa me anima. Este tramo era pequeno e logo toca volver a subir outro pouco pero que xa fago correndo e gañando algún posto.

Tras esta subida, teríamos que baixar entre as árbores e con coidado de non chocar contra elas e mirando onde se pisaba porque un dos voluntarios estaba avisando de que había buratos no chan pero que consigo baixar sen meter o pé en ningún e sen maiores problemas. Unha vez baixamos e saímos da zona de arbores alí estaba novamente Eduardo para sacar algunha foto e animarme novamente.

Volvemos a subir un pouco e eu xa estaba desexando que chegara a zona de baixar para ir a zona do río. Comezamos a baixar e chegamos ao avituallamento onde paso del e non collo auga, ao pasar polo voluntarios que estaban nun cruce onde se volvía a coller uns 100 metros de asfalto xa avisan que agora viña o divertido e que levara o flotador, a min deume a risa pero xa tiña ganas de chegar a zona do rio. 

Durante a baixada eu miraba cara atrás seguido porque ía só, ninguén por diante nin por detrás e tiña que ir mirando seguido se ía polo camiño correcto porque me parecía estraño que me quedara só pero ía ben seguindo as marcas laranxas, incluso me da tempo a pensar (cousa rara en min... jajaja) que xa sei para que se levan os xeles ou barritas porque nese momento comezoume a entrar unha fame... para o próximo trail vou ter que levar avituallamento propio e comer algo durante a carreira!

De repente empezase a escoitar o río polo que ía comezar o entretido. Chego a onde estaba unha voluntaria e me di que había que ir cara abaixo e con coidado, eu xiro e vexo o rio de fronte, levanto a vista e non vexo marcas nin nada e sen pensalo moito, tírome ao rio, cando escoito berrar a voluntaria "por aí non é, pegado ao río" e é entón cando vexo as marcas intento dar marcha atrás para saír do río que me cubría ata a altura do estómago, por sorte non era máis profundo porque non é que eu saiba nadar... saín do río como puiden, a catro patas e póñome de pé para seguir correndo, ríndome do que acababa de facer. Iso si, aí comezaron os problemas xa que no esforzo de saír do rio os xemelgos dixeron basta e estaba a punto de que me dera un tirón. 

A zona do río era preciosa, daban ganas de pararse a desfrutar mellor das paisaxes e do ambiente que había pero tiña que seguir, alí non podía quedar. Había voluntarios que ata axudaban a subir unha pedra a pesar de que había unha corda, el botábache a man para axudarche a subir.

Por fin chegamos a zona onde si que había que cruzar o rio, axudado dunha corda para non caer xa que era fácil perder o equilibrio porque alí o río levaba algo de forza.

Saímos e seguimos polo carón do río con calma xa que había que saltar de pedra en pedra e ter coidado coas raíces das árbores, chegamos a un muíño onde me paro porque non sabía por onde pasar, decido bordealo e xa vexo as marcas para continuar, tamén se podía entrar por el para pasar. Tras esa parada xa vía como me estaban a coller por detrás.

No momento no que tiñamos que saltar un regato pequeno véxome obrigado a parar e estirar porque os xemelgos dixeron basta, nese momento comézanme a adiantar pero sempre preguntándome se estaba ben e se podía continuar.
Sigo como podo e de repente outra vez a cruzar o río, desta vez sen corda, coa auga a altura dos cuadríceps, tras saír teño que volver a estirar e seguir con un ritmo máis tranquilo porque senón vía que non ía dar chegado. 

Abandonamos a zona do río e nos adentramos novamente no monte para dirixirnos cara a meta, onde o terreo aínda nos tiña preparado algunha sorpresa.

Tras abandonar o barro xa non quedaba nada, unha pequena costa onde miro cara atrás e vexo que non ía perder máis postos polo que me deixo levar os últimos 300 metros para chegar a meta e poñerme a estirar novamente.

O resultado final foi:

• Posición xeral: 68º de 253
• Posición categoría: 51º
• Tempo: 1:19:28.
• Ritmo: 5:41 min/km

Os obxectivos cumpridos, o nocello parece que me deixa correr ben, aínda que nalgún movemento me sigue doendo. Desfrutei moito da proba sobre todo cando se empezou a baixar cara o rio e a zona do río é espectacular. O único problema foron os meus xemelgos que lle chegou correr onte, volver hoxe sen adestrar nada en dúas semanas pero pouco a pouco haberá que ir recuperando o ritmo competitivo. 

Para o ano espero volver a disputar esta divertida proba, ata é posible que me anote ao circuíto das Trail Series porque menos a primeira proba que non puiden asistir porque coincidía co Campionato Galego de Cross Largo as dúas probas seguinte estiven presentes e espero estar na derradeira a finais de mes en Rianxo no Trail de Castro Barbudo.

Información técnica:

• Distancia: 14 km
• Desnivel +: 475 m.
• Pendiente máxima: 25,8%
• Pendiente media: 6,5%

🏆 Clasificación xeral homes 🏆

1. Loís Rodríguez Boga ............ 1:02:26
2. Andrés Fontenla Paredes ...... 1:03:25
3. José L. Turnes Souto ............ 1:04:23

🏆 Clasificación xeral mulleres 🏆

1. Bea Amado ........................... 1:23:20
2. Marlen Trucios Gomez ......... 1:23:36
3. María Mareque Martínez ...... 1:25:41

PD: Clasificación completa. Fotos cortesía de: Dani Gestoso de La Voz de Galicia, Arousa NeO, Revolutrion e Lisardo Vilar Fotografía. Moitas Gracias!!