V Carreira Pedestre Concello de Oroso

Queda unha semana para a aventura de correr a Wings For Life World Run pero antes toca desprazarse a Sigüeiro para disputar a V Carreira Pedestre Concello de Oroso sobre unha distancia de 10 km e que xa correra no 2015 onde conseguín chegar ao podio. Este ano chego mal porque pasei toda a semana con gripe e aínda estou saíndo dela polo que non sei como vai responder o corpo.

Os obxectivos serán:
  • Ver como responde o corpo ao estar aínda con algo de gripe.
  • Intentar mellorar o tempo do 2015 que é de 37:03.
  • Volver a subir ao podio, aínda que coa gripe vai estar complicado.
Unha vez chego, vou recoller o dorsal e xa me vou atopando con amigos das carreiras, como aínda quedaba algo de tempo para poñerse a quecer imos tomar un café a un bar con miña nai, tía e avoa que viñeron verme correr.

Chegado o momento cámbiome e comeza a cambiar o tempo, non ameazaba choiva pero comezou a soprar un forte aire e a facer máis frío, algo que para a miña gripe non ía vir moi ben. Comezo o quecemento cos compañeiros mentres miramos o nivel que ía haber na carreira.


Rematado o quecemento, vou para a saída e como o obxectivo era mellorar o tempo e subir ao podio, coloqueime bastante adiante para saír forte dende o comezo e aguantar ata onde dea.

Dáse a saída e arranco bastante ben, sen moitos problemas, comezando a tirar e intentando aguantar o ritmo do grupo de cabeza no que de momento me atopo.


Aguanto o ritmo dos primeiros sobre 1,5 km pero despois non son capaz de seguilos e intento marcar o meu ritmo, aínda así vou gañando posicións segundo van pasando os km.

Todo cambia sobre o km 5, cando o corpo comeza a dicir basta e non dou respirado con normalidade xa que aínda teño moita mucosidade na garganta e non era capaz de respirar ben polo que teño que ir máis tranquilo e estar seguido mirando para atrás para controlar que non me adiantara moita xente.

Perdo varios postos e é que a parte de non dar respirado non recordaba que a carreira na súa parte final antes de volver cara Sigüeiro tiña unhas costas importantes que me deixaron as pernas rotas.

Sigo tirando como podo e cando vexo que queda un km para a meta, miro cara atrás onde se acercaba un numeroso grupo de corredores e é cando comezo a dar todo o que me quedaba para no perder máis postos pero na recta de meta non son capaz de aguantar o sprint de outro corredor e perdo outro posto.


O final o resultado foi:
  • Posición xeral: 18º de 123
  • Posición categoría: 6º
  • Tempo: 37:00
  • Ritmo: 3:42 min/km
Os obxectivos máis ou menos xa que conseguín mellorar o tempo do 2015 en 3 segundos pero non así a posición e non fun capaz de chegar ao podio, ademais a gripe non me deixou render ao máximo e houbo zonas nas que sufrín bastante coa respiración pero era o que tocaba ao correr medio enfermo.

🏆 Clasificación xeral homes 🏆
  1. Nuno Costa ........................ 32:41
  2. Diego Paz Sobreira ............ 33:11
  3. Roberto Barral Noya .......... 33:52
🏆 Clasificación xeral mulleres 🏆
  1. Belén Bascoy Cao .............. 41:05
  2. Shaila M. Muñiz Pérez ....... 43:42
  3. María Tarrio Martínez ........ 45:25
PD: Clasificación completa. Fotos cortesía de do Concello de Oroso. Moitas gracias!!

Tamén che pode gustar:

0 comments